910世界防止自殺日 音樂伴隨走出情緒黑洞

9月，會令你諗起乜嘢？開學？林家謙首歌《難道喜歡處女座》？仲唔止啊！
原來世界衛生組織喺2003年將每年9月10日定為「世界防止自殺日」，想全球關注多啲自殺風氣問題；而今個星期五就係2021年嘅「世界防止自殺日」喇！

其實自殺問題喺香港都好值得關注，根據香港撤瑪利亞防止自殺會嘅數字顯示，2020年共有1,019宗自殺個案，比2018年嘅955宗、2019年嘅993宗，有上升趨勢；當中60歲以上長者個案佔43%，係有記錄新高！組織嘅自殺危機處理中心，喺2020年介入咗1,316宗個案，以家庭、經濟或精神健康為主要問題；如果中心未有即時介入，尋死可能成為佢哋嘅解脫方法，我哋要減少相關事情嘅發生！

每個人總有低落、唔開心嘅情緒，亦有好多方式處理。身為音樂治療機構嘅我哋，就當然會叫大家以音樂舒緩情緒！有研究發現，聽音樂會釋放一種「快樂物質」胺多酚，有助調節我哋嘅情緒，所以大家不妨整一張屬於自己嘅「情緒歌單」，開心聽吓、唔開心又聽吓，透過音樂帶畀大家力量/ 正面嘅情緒。

Playlist入面除咗有旋律令人放鬆、覺得開心嘅歌，亦可以有傷感嘅歌曲啊！喺情緒低落時聽吓，原來會令我哋有種陪伴嘅感覺，好似幫緊自己講出內心感受，話你知「I know that feel bro」，名副其實嘅「有共鳴，不變」🙊！

音樂治療對精神健康—如焦慮、抑鬱等，有一定幫助；如果發覺身邊嘅人、甚至自己，有情緒上嘅問題，除咗尋求精神科、心理治療等協助，音樂治療都係一個令人走出「情緒黑洞」嘅渠道/方式。唔單止唱歌咁簡單，註冊音樂治療師會透過唔同方法，改善受助者嘅精神健康添！